വ്യാസം വസിഷ്ഠനപ്താരം ശക്തേഃ പൌത്രമകല്മഷമ് ।
പരാശരാത്മജം വംദേ ശുകതാതം തപോനിധിമ് ॥ 1
വ്യാസായ വിഷ്ണുരൂപായ വ്യാസരൂപായ വിഷ്ണവേ ।
നമോ വൈ ബ്രഹ്മനിധയേ വാസിഷ്ഠായ നമോ നമഃ ॥ 2
കൃഷ്ണദ്വൈപായനം വ്യാസം സർവലോകഹിതേ രതമ് ।
വേദാബ്ജഭാസ്കരം വംദേ ശമാദിനിലയം മുനിമ് ॥ 3
വേദവ്യാസം സ്വാത്മരൂപം സത്യസംധം പരായണമ് ।
ശാംതം ജിതേംദ്രിയക്രോധം സശിഷ്യം പ്രണമാമ്യഹമ് ॥ 4
അചതുർവദനോ ബ്രഹ്മാ ദ്വിബാഹുരപരോ ഹരിഃ ।
അഫാലലോചനഃ ശംഭുഃ ഭഗവാന് ബാദരായണഃ ॥ 5
ശംകരം ശംകരാചാര്യം കേശവം ബാദരായണമ് ।
സൂത്രഭാഷ്യകൃതൌ വംദേ ഭഗവംതൌ പുനഃ പുനഃ ॥ 6
ബ്രഹ്മസൂത്രകൃതേ തസ്മൈ വേദവ്യാസായ വേധസേ ।
ജ്ഞാനശക്ത്യവതാരായ നമോ ഭഗവതോ ഹരേഃ ॥ 7
വ്യാസഃ സമസ്തധര്മാണാം വക്താ മുനിവരേഡിതഃ ।
ചിരംജീവീ ദീര്ഘമായുര്ദദാതു ജടിലോ മമ ॥ 8
പ്രജ്ഞാബലേന തപസാ ചതുർവേദവിഭാജകഃ ।
കൃഷ്ണദ്വൈപായനോ യശ്ച തസ്മൈ ശ്രീഗുരവേ നമഃ ॥ 9
ജടാധരസ്തപോനിഷ്ഠഃ ശുദ്ധയോഗോ ജിതേംദ്രിയഃ ।
കൃഷ്ണാജിനധരഃ കൃഷ്ണസ്തസ്മൈ ശ്രീഗുരവേ നമഃ ॥ 10
ഭാരതസ്യ വിധാതാ ച ദ്വിതീയ ഇവ യോ ഹരിഃ ।
ഹരിഭക്തിപരോ യശ്ച തസ്മൈ ശ്രീഗുരവേ നമഃ ॥ 11
ജയതി പരാശരസൂനുഃ സത്യവതീ ഹൃദയനംദനോ വ്യാസഃ ।
യസ്യാസ്യ കമലഗലിതം ഭാരതമമൃതം ജഗത്പിബതി ॥ 12
വേദവിഭാഗവിധാത്രേ വിമലായ ബ്രഹ്മണേ നമോ വിശ്വദൃശേ ।
സകലധൃതിഹേതുസാധനസൂത്രസൃജേ സത്യവത്യഭിവ്യക്തി മതേ ॥ 13
വേദാംതവാക്യകുസുമാനി സമാനി ചാരു
ജഗ്രംഥ സൂത്രനിചയേന മനോഹരേണ ।
മോക്ഷാര്ഥിലോകഹിതകാമനയാ മുനിര്യഃ
തം ബാദരായണമഹം പ്രണമാമി ഭക്ത്യാ ॥ 14
ഇതി ശ്രീ വേദവ്യാസ സ്തുതിഃ ।
