ವ್ಯಾಸಂ ವಸಿಷ್ಠನಪ್ತಾರಂ ಶಕ್ತೇಃ ಪೌತ್ರಮಕಲ್ಮಷಮ್ ।
ಪರಾಶರಾತ್ಮಜಂ ವಂದೇ ಶುಕತಾತಂ ತಪೋನಿಧಿಮ್ ॥ 1
ವ್ಯಾಸಾಯ ವಿಷ್ಣುರೂಪಾಯ ವ್ಯಾಸರೂಪಾಯ ವಿಷ್ಣವೇ ।
ನಮೋ ವೈ ಬ್ರಹ್ಮನಿಧಯೇ ವಾಸಿಷ್ಠಾಯ ನಮೋ ನಮಃ ॥ 2
ಕೃಷ್ಣದ್ವೈಪಾಯನಂ ವ್ಯಾಸಂ ಸರ್ವಲೋಕಹಿತೇ ರತಮ್ ।
ವೇದಾಬ್ಜಭಾಸ್ಕರಂ ವಂದೇ ಶಮಾದಿನಿಲಯಂ ಮುನಿಮ್ ॥ 3
ವೇದವ್ಯಾಸಂ ಸ್ವಾತ್ಮರೂಪಂ ಸತ್ಯಸಂಧಂ ಪರಾಯಣಮ್ ।
ಶಾಂತಂ ಜಿತೇಂದ್ರಿಯಕ್ರೋಧಂ ಸಶಿಷ್ಯಂ ಪ್ರಣಮಾಮ್ಯಹಮ್ ॥ 4
ಅಚತುರ್ವದನೋ ಬ್ರಹ್ಮಾ ದ್ವಿಬಾಹುರಪರೋ ಹರಿಃ ।
ಅಫಾಲಲೋಚನಃ ಶಂಭುಃ ಭಗವಾನ್ ಬಾದರಾಯಣಃ ॥ 5
ಶಂಕರಂ ಶಂಕರಾಚಾರ್ಯಂ ಕೇಶವಂ ಬಾದರಾಯಣಮ್ ।
ಸೂತ್ರಭಾಷ್ಯಕೃತೌ ವಂದೇ ಭಗವಂತೌ ಪುನಃ ಪುನಃ ॥ 6
ಬ್ರಹ್ಮಸೂತ್ರಕೃತೇ ತಸ್ಮೈ ವೇದವ್ಯಾಸಾಯ ವೇಧಸೇ ।
ಜ್ಞಾನಶಕ್ತ್ಯವತಾರಾಯ ನಮೋ ಭಗವತೋ ಹರೇಃ ॥ 7
ವ್ಯಾಸಃ ಸಮಸ್ತಧರ್ಮಾಣಾಂ ವಕ್ತಾ ಮುನಿವರೇಡಿತಃ ।
ಚಿರಂಜೀವೀ ದೀರ್ಘಮಾಯುರ್ದದಾತು ಜಟಿಲೋ ಮಮ ॥ 8
ಪ್ರಜ್ಞಾಬಲೇನ ತಪಸಾ ಚತುರ್ವೇದವಿಭಾಜಕಃ ।
ಕೃಷ್ಣದ್ವೈಪಾಯನೋ ಯಶ್ಚ ತಸ್ಮೈ ಶ್ರೀಗುರವೇ ನಮಃ ॥ 9
ಜಟಾಧರಸ್ತಪೋನಿಷ್ಠಃ ಶುದ್ಧಯೋಗೋ ಜಿತೇಂದ್ರಿಯಃ ।
ಕೃಷ್ಣಾಜಿನಧರಃ ಕೃಷ್ಣಸ್ತಸ್ಮೈ ಶ್ರೀಗುರವೇ ನಮಃ ॥ 10
ಭಾರತಸ್ಯ ವಿಧಾತಾ ಚ ದ್ವಿತೀಯ ಇವ ಯೋ ಹರಿಃ ।
ಹರಿಭಕ್ತಿಪರೋ ಯಶ್ಚ ತಸ್ಮೈ ಶ್ರೀಗುರವೇ ನಮಃ ॥ 11
ಜಯತಿ ಪರಾಶರಸೂನುಃ ಸತ್ಯವತೀ ಹೃದಯನಂದನೋ ವ್ಯಾಸಃ ।
ಯಸ್ಯಾಸ್ಯ ಕಮಲಗಲಿತಂ ಭಾರತಮಮೃತಂ ಜಗತ್ಪಿಬತಿ ॥ 12
ವೇದವಿಭಾಗವಿಧಾತ್ರೇ ವಿಮಲಾಯ ಬ್ರಹ್ಮಣೇ ನಮೋ ವಿಶ್ವದೃಶೇ ।
ಸಕಲಧೃತಿಹೇತುಸಾಧನಸೂತ್ರಸೃಜೇ ಸತ್ಯವತ್ಯಭಿವ್ಯಕ್ತಿ ಮತೇ ॥ 13
ವೇದಾಂತವಾಕ್ಯಕುಸುಮಾನಿ ಸಮಾನಿ ಚಾರು
ಜಗ್ರಂಥ ಸೂತ್ರನಿಚಯೇನ ಮನೋಹರೇಣ ।
ಮೋಕ್ಷಾರ್ಥಿಲೋಕಹಿತಕಾಮನಯಾ ಮುನಿರ್ಯಃ
ತಂ ಬಾದರಾಯಣಮಹಂ ಪ್ರಣಮಾಮಿ ಭಕ್ತ್ಯಾ ॥ 14
ಇತಿ ಶ್ರೀ ವೇದವ್ಯಾಸ ಸ್ತುತಿಃ ।
