kadambavanachāriṇīṃ munikadambakādambinīṃ
nitambajitabhūdharāṃ suranitambinīsēvitām ।
navāmburuhalōchanāmabhinavāmbudaśyāmalāṃ
trilōchanakuṭumbinīṃ tripurasundarīmāśrayē ॥ 1 ॥
kadambavanavāsinīṃ kanakavallakīdhāriṇīṃ
mahārhamaṇihāriṇīṃ mukhasamullasadvāruṇīm ।
dayāvibhavakāriṇīṃ viśadarōchanāchāriṇīṃ
trilōchanakuṭumbinīṃ tripurasundarīmāśrayē ॥ 2 ॥
kadambavanaśālayā kuchabharōllasanmālayā
kuchōpamitaśailayā gurukṛpālasadvēlayā ।
madāruṇakapōlayā madhuragītavāchālayā
kayāpi ghananīlayā kavachitā vayaṃ līlayā ॥ 3 ॥
kadambavanamadhyagāṃ kanakamaṇḍalōpasthitāṃ
ṣaḍamburuhavāsinīṃ satatasiddhasaudāminīm ।
viḍambitajapāruchiṃ vikachachandrachūḍāmaṇiṃ
trilōchanakuṭumbinīṃ tripurasundarīmāśrayē ॥ 4 ॥
kuchāñchitavipañchikāṃ kuṭilakuntalālaṅkṛtāṃ
kuśēśayanivāsinīṃ kuṭilachittavidvēṣiṇīm ।
madāruṇavilōchanāṃ manasijārisammōhinīṃ
mataṅgamunikanyakāṃ madhurabhāṣiṇīmāśrayē ॥ 5 ॥
smarētprathamapuṣpiṇīṃ rudhirabindunīlāmbarāṃ
gṛhītamadhupātrikāṃ madavighūrṇanētrāñchalām ।
ghanastanabharōnnatāṃ galitachūlikāṃ śyāmalāṃ
trilōchanakuṭumbinīṃ tripurasundarīmāśrayē ॥ 6 ॥
sakuṅkumavilēpanāmalakachumbikastūrikāṃ
samandahasitēkṣaṇāṃ saśarachāpapāśāṅkuśām ।
aśēṣajanamōhinīmaruṇamālyabhūṣāmbarāṃ
japākusumabhāsurāṃ japavidhau smarāmyambikām ॥ 7 ॥
purandarapurandhrikāchikurabandhasairandhrikāṃ
pitāmahapativratāpaṭupaṭīracharchāratām ।
mukundaramaṇīmaṇīlasadalaṅkriyākāriṇīṃ
bhajāmi bhuvanāmbikāṃ suravadhūṭikāchēṭikām ॥ 8 ॥
iti śrīmatparamahaṃsaparivrājakāchāryasya śrīgōvindabhagavatpūjyapādaśiṣyasya śrīmachChaṅkarabhagavataḥ kṛtau tripurasundaryaṣṭakam ।
